Изготвен е идеен проект

за доградба на клонот „Сончогледи“ при ЈОУДГ „Детска радост“- Гевгелија. Станува збор за проширување на објектот со нови 8 занимални и сместувачки капацитет за 135 деца. Површината на доградениот објект ќе изнесува 1000 метри квадратни.

            Предвидени се: 1 просторија - работилница  (мултуфункционален простор кој покрај примарната функција ќе може да згрижи 25-30 деца корисници); 1 просторија за изолација; 1 просторија за индивидуална работа; чајна кујна; млечна кујна во близина на јаслената група; санитарни јазли за вработени димензионирани според бројот на вработените ( 16 негователи и воспитувачи +  2 хигиеничари + 1 медицинска сестра); просторија или катче за индивидуална работа; пристап до надворешен простор за игра; ветробран и влезна партија во објект со простор за оставање на детски колички.

            На фасадата се предвидени површини за цртање со креда, магнетизирани површини кои ќе овозможуваат игра и учење, површини за качување и физичка активност и површини кон игралиштето кои ќе бидат од спој на материјали со различна текстура и ќе овозможат тактилно учење при допир. 

            Реквизитите предвидени на игралиштето треба да поттикнат групна игра и да не се наменети да се користат едновремено од едно дете. Реквизитите треба да овозможат истовремено и учење преку игра.

            Партерно уредување на земјиштето ќе биде со: трева, високо и ниско зеленило, патеки од гумирани материјали кои го ублажуваат ударот (сите пристапни патеки за деца, како и патеките на игралиштето), a објектот ќе биде ограден со лесен материјал кој нема да предизвикува исекотни.