Советот за социјална заштита на Општина Гевгелија ја одржа

својата 2 седница. На седницата, беше усвоен Деловникот за работа на Советот. Во однос на барањето на Здружението за лицата со телесен инвалидитет „Мобилност“- Гевгелија за воведување социјална услуга помош и нега во домот, секретарот на ОО Црвен крст- Гевгелија, Лазар Мешков, ги запозна членовите на Советот со преземањето активности за воведување на услугата на подрачјето на Општина Гевгелија. Имено, ОО Црвен крст- Гевгелија започна со давањето на услуги за нега во домот на стари лица над 65 години и лица со попреченост преку комерцијалниот месечен пакет со утврдени цени за користење на услугата. Во моментот, преку ОО Црвен крст- Струмица со лиценца за негуватели се стекнати 19 лица од општина Гевгелија.
           Советот беше информиран и за надлежностите на Општината во областа на социјалните услуги. Согласно Законот за социјална заштита, посебно е уредено обезбедувањето средства за давање социјални услуги на општините, за што Министерството за труд и социјална политика еднаш годишно објавува Јавен повик. Во координација со Советот за социјална заштита на планскиот регион, Општина Гевгелија заедно со лиценциран давател на услуга ќе аплицира на повикот годинава, со цел оваа услуга да се користи бесплатно.
           Членовите на Советот, исто така, беа информирани дека за зајакнување на нивните капацитети ќе се организираат работилници од Министерството за труд и социјална политика, со поддршка на Канцеларијата на УНДП. Покрај ова, на седницата беше повторно укажано на потребата од изградба на пристапни рампи за лица со телесен инвалидитет во институциите, како и прилагодување на патната инфраструктура, согласно нивните потреби.