Градоначалникот на општина Гевгелија, Андон Сарамандов,

денеска, оствари работна средба со амбасадорот на Јапонија, Н.Е. Хиронори Савада, чија посета се должеше во врска со донираниот нов рендген-апарат на ЈЗУ Општа болница со проширена дејност во Гевгелија, од страна на Јапонската амбасада. На средбата, исто така, стана збор и за можностите за продолжување на соработката. Градоначалникот Сарамандов му посака добредојде на јапонскиот амбасадор, притоа истакнувајќи ја својата благодарност за досегашната поддршка и помош на Општина Гевгелија.
           По средбата, гевгелискиот градоначалник, јапонскиот амбасадор и директорот на ЈЗУ Општа болница со проширена дејност, д-р Митко Крџев, беа во посета на болницата, на Одделението за рендгенологија и радиодијагностика, каде новиот рендген-апарат беше предаден во употреба, со церемонија за комплетирање на GGP- проектот.
            - Преку GGP, досега, Јапонија финансираше над 60 проекти во здравствениот сектор во вкупна вредност од повеќе од три милиони евра конкретно во медицинска опрема, реновирање на клиники и возила за брза помош. Дополнително, Јапонија во последните две години ги опремува јавните здравствени установи со медицинска опрема во вредност од 813.000 евра како итна помош за КОВИД-19, дел од Програмата за економски и социјален развој и дополнителна нефинансиска помош понудена во лекови за 100 пациенти со КОВИД-19. Јапонскиот народ му помага и во иднина ќе му помага на македонскиот народ со вакви донации во областа на здравството, образованието и животната средина. Од 1996 година, во овие области се донирани средства во висина од 8,5 милиони евра, рече јапонскиот амбасадор, Хиронори Савада, потенцирајќи го своето задоволство што со новиот рендген-апарат во минатата година, во ЈЗУ Општата болница- Гевгелија, биле направени 4.000 снимања.
            - Новиот рендген-апарат ќе придонесе за подобро функционирање на Општата болница во Гевгелија и подобрување на здравствените услуги за граѓаните на општина Гевгелија. Ваквата соработка за нас е мошне значајна, бидејќи на тој начин го зајакнуваме нашето пријателство и градиме мост на солидарност помеѓу двата народи, истакна Сарамандов, уште еднаш изразувајќи ја својата благодарност до јапонскиот амбасадор за донацијата.
             Исто така, и директорот на Општата болница, д-р Митко Крџев, во свое име, како и во име на целокупниот персонал на болницата, изрази благодарност по повод овој хуман гест, донирањето на современиот дигитален рендген-апарат, кој многу ќе придонесе за зголемување на безбедноста и благосостојбата на пациентите преку навремено дијагностицирање. Притоа, началникот на Одделението за рендгенологија и радиодијагностика, д-р Нако Поп Ристов, истакна дека рендген-апаратот овозможи правење квалитетни снимки, со што, во време на КОВИД-кризата, пациентите добиваа навремена и прецизна дијагностика.