Гевгелија, по подолго време, ќе добие голем урбан парк.

На просторот пред станбениот комплекс на булевар „Гевгелија“, познат како „Социјални згради“, ќе никне нов Градски парк. Станува збор за досега најголем уреден простор во градското подрачје на Гевгелија, на површина од 6.000 метри квадратни, наменет за одмор и рекреација. По изработката на проектот, завршувањето на тендерската постапка и изборот на најповолен изведувач, започнаа подготвителните работи. На почетокот од расчистувањето на локацијата, на просторот кај вториот кружен тек на булеварот „Гевгелија“, од едната страна и улицата „Сава Михајлов“ од другата страна, градоначалникот на општина Гевгелија, Андон Сарамандов, изврши увид во воведните работи за реализација на овој значаен еко-проект.
           - Согласно проектот, паркот ќе располага со хортикултурно-уредени зелени површини, пешачки патеки, партерно уредени со павер елементи, урбана опрема и современо осветлување. Воедно, тука ќе никнат и нови садници со кои ќе придонесеме за зголемување на зелените површини во нашата општина, истакна градоначалникот Андон Сарамандов, нагласувајќи дека за реализацијата на новиот урбан Градски парк се обезбедени 6.500.000 денари во Буџетот на Општина Гевгелија за 2023 година.
           Изградбата на новиот Градски парк, градоначалникот на општина Гевгелија, Андон Сармандов, ја најави на 26. седница на Советот на Општина Гевгелија, информирајќи ги советниците дека на избраната локација, согласно Урбанистичкиот план, беше предвидена изградба на станбени згради. Но, имајќи ги предвид барањата на граѓаните и недостигот од зелени површини, донесена е одлука за пренамена на земјиштето и изградба на нов градски парк, со што ќе се подигне квалитетот на животот на граѓаните во Гевгелија, истакна притоа Сарамандов.
           Со уредувањето на просторот кај кружниот тек на булеварот „Гевгелија“, гевгеличани ќе добијат најсовремен, хортикултурно-уреден и модерен парк. Во паркот покрај изградбата на пешачки патеки, ќе бидат поставени 40 клупи за одмор, 18 корпи за отпад, како и два парковски држачи за велосипед. Исто така, целиот парк ќе биде осветлен со 25 лед светилки. По изведбата на градежните работи и поставување на урбаната опрема, ќе се пристапи и кон хортикултурно уредување.