Вчера,

во есенската приквечерина, на платото на плоштадот „Сава Михајлов“, под гевгелиското небо најмалите имаа можност да уживаат во уличниот перформанс на живи скулптури „Ноќ во музејот“. Тоа уживање на децата, а покрај нив и на возрасните, им го приреди Домот на културата „Македонија“- Гевгелија во пресрет и одбележување на Светската недела на детето, во соработка со Домот на културата „Иван Мазов- Климе“ од Кавадарци.

            Дечињата имаа можност да влезат во светот на живите скулптури кои ги толкуваа ликовите од познатите сказни за деца: „Пепелашка“, „Убавицата и ѕверот“, „Волшебникот од Оз“, „Снежната кралица“, каубојот Док Холидеј… Ликовите ги оживеаја: Стојанче Вангелов, Ангел Милков, Смиља Бошкова, Сашко Орешков и Валерија Пашова, а режисерката Микица Илова беше лошата вештерка. Актерите Диме Боцев и Диме Коцевски ги толкуваа момчињата Тошко и Пеце, кои по грешка, наместо во лунапаркот, залутале во Музејот на живи скулптури и заедно со публиката преку низа комични ситуации ги откриваа ликовите од познатите сказни за деца.

            Домот на културата изрази благодарност до директорката Јулијана Туриманџова, целата екипа и режисерот Микица Илова за нивното гостување, со надеж дека ќе продолжат со понатамошна соработка.