„SBF“ ученичката компанија

од СОУ "Јосиф Јосифовски" од Гевгелија со проектот СБФ-Соларната торба на иднината го освои високото второ место на Националниот натпревар за најдобра ученичка компанија на Junior achievement Macedonia, 2020. 

              Свеченото прогласување на победниците се одржа онлајн, на Јутјуб-каналот на achievement Macedonia. Слободанка Савиќ, Никола Биков, Пепица Јованова, Душко Јанев и Ангелина Несторова, овогодинешни матуранти, под менторство на проф. Јасмина Мицева, со својот производ, СБФ-Соларната торба на иднината ја понесоа втората награда во конкуренција со 9 финалисти.

              - Одлично се чувствуваме, мораме да признаеме дека возбудата додека ги очекувавме резултатите беше на високо ниво. Впечатоците ни се измешани и ќе ни треба некое време да ги сумираме самите резултатите и да одлучиме што понатаму бидејќи ова не ни е прв позначаен резултат со проектот, но мораме да истакнеме дека ова ни е на највисок ранг. Секако, ќе се потрудиме целиот проект успешно да профункционира и како иновација никогаш да не згасне. Да, нашиот тимски дух секогаш цели кон најголемите успеси, но, секако, во некои ситуации не можеме да влијаеме директно. Сакаме да се заблагодариме на сите за огромната поддршка во изминатиот период и довербата кон нашиот концепт кој веќе полни 9 месеци успешно чекори како вистинска иновација на пазарот и го привлекува вниманието на идните корисници. Сакаме да се заблагодариме и на нашиот ментор - Јасмина Мицева која не внесе во водите на бизнисот и претприемништвото и со која имавме успешна соработка и многу успеси. Посебна благодарност и до проф. Марија Танева која одговорно и гордо стои зад концептот SBF и примената на Peltier - модули на еден поинаков начин од аспект на науката, истакнаа второнаградените ученици од СОУ „Јосиф Јосифовски“- Гевгелија.