Во ЈОУДГ „Детска радост“- Гевгелија значително се подобруваат условите

за работа за згрижувањето и престојот на децата од претшколска возраст. Имено, покрај реализираните инфраструктурни зафати, овојпат во Централната градинка се вложени нови инвестиции за доопремување на кујната. Набавени се кујнски апарати и опрема во вредност од 800.000 денари, со средства од Сопствениот буџет- ставка блок-дотации. Се работи за нов индустриски казан, со капацитет за приготвување храна од 300 л., индустриски шпорет и индустриска машина за миење садови.
             Како што истакна директорката на ЈОУДГ „Детска радост“, Елизабета Стефановска, со новите кујнски апарати и опрема на вработените во градинката кои ја приготвуваат храната за дечињата значително ќе им бидат олеснет процесот на готвење и работата, а истите ќе придонесат за подобрување на квалитетот на храната која е наменета за сите дечиња згрижени во останатите клоновите под капата на ЈОУДГ „Детска радост“. Што значи дека, во услови на пандемија и бројот на згрижени деца утврдени со протоколите за згрижување, 700 дечиња ќе се хранат уште поквалитетно.
             Инаку, со бројни реализирани зафати значително се подобрени условите за престој на децата во Детските градинки во Гевгелија и во населените места. За таа цел беа вложени финансии, заштедени средства од донациите, но и средства обезбедени од Општина Гевгелија. Во вкупна висина од 15.000.000 денари за: реконструкција на ѕидовите, молеро-фарбарски работи и подобрување на електро-инсталационата мрежа во Централната градинка „Детска радост“- Гевгелија. Исто така, беше извршена замена на мебелот во сите занимални во градинката „Цветови“, а набавени беа нови гардеробери во Градинките „Детска радост“ и „Цветови“.
             Покрај ова, во новоотворениот оддел за јасли во Градинката во Миравци беа набавени креветчиња, во сите градинки поставени нови теписи, набавени нови играчки и друга потребна опрема. Во Централната детска градинка во Гевгелија и во Детската градинка во Негорци беше извршена целосна замена на столаријата. Се реновираа тоалетите во ЈОУДГ „Детска радост“, како и во клоновите „Сончогледи“ и Цветови. Во сите детски градинки извршено е климатизирање на сите простории. Како и заменет дотраениот и оштетен под со ламинат во сите објекти, на површина од 2.660 метри квадратни.