На тема „Семејното насилство“, денеска, градоначалникот

на општина Гевгелија, Сашо Поцков, оствари работен состанок со претставници на надлежните институции: ЈУ Меѓуопштинскиот центар за социјална работа- Гевгелија и ОВР- Гевгелија, како и претставници на три Невладини организации од општина Гевгелија.

            Состанокот беше поделен на два дела, информативен дел за општата ситуација со семејното насилство во општината, а вториот дел се состоеше од сумирање на идеите во насока на проширување на соработката помеѓу локалната самоуправа, надлежните општински институции и невладиниот сектор за превенирање и решавање на долгогодишниот горлив проблем во општеството- семејното насилство.

            Што се однесува до бројките на жртвите на семејно насилство, за разлика од минатата година е намален, но за време на КОВИД-пандемијата е значително зголемен поради економската криза. Според податоците од ЈУ Меѓуопштинскиот центар за социјална работа- Гевгелија, на локално ниво, моментално има активни 22 предмета, од кои 12 се од минатата година. Според евидентираните податоци, во ОВР- Гевгелија, во текот на 2020 година, биле поднесени 5 кривични пријави за семејно насилство, од кои 3 за телесна повреда, а 2 за загрозување на сигурноста. Пристигнале и 15 известувања, од кои 3 за телесна повреда, а 12 за загрозување на сигурноста.

            Директорот на ЈУ МЦСР- Гевгелија, Васка Илиева, истакна дека стручниот тим при јавната установа ги презема сите соодветни законски мерки во соработка со Основен суд и МВР, но се соочуваат со одредени недостатоци во поглед на решавање на конкретните проблеми. Илиева истакна дека недостасуваат финансиски средства, со кои ќе располага Центарот за постапувањето и пружењето помош на жртвите на семејното насилство и соодветен простор за ургентно згрижување- сигурни куќи. Како најчести жртви на семејно насилство во поново време ги посочи старите лица и тоа од страна на нивните деца поради финансиското или имотното прашање. Покрај ова, од ОВР информираа дека најчеста причина за семејното насилство е и алкохолот. МВР постапува по секоја примена пријава или поплака, без разлика дали постојат елементи на кривичното дело при првичното пријавување.

            По долгата дискусија и размената на идеи, присутните донесоа заклучок дека потребно е да се изготви локален Акционен план, во кој ќе бидат предвидени конкретните дејства за надминување на социјалните проблеми, во соработка со надлежните служби, институциите и невладиниот сектор.